Joh 10 | ENQ | STEP | Dee Jisasame dokaita lamaiyoo, “Nambame etete kiningi nyakama langilyona, endakali mendeme sipisipi kame kaita lumbao nyingi dokonya napenya, waka mendasa kaita kisoo pyakanatamo akali doko baa pake nao makongao paenge akali.

a10:1-21Jet 23:1-3; Ese 34:1-31

b10:2Mk 6:34

c10:3Jo 10:26-27

d10:4Eke 13:22

e10:6Jo 16:25

f10:9Wee 118:20; Ais 49:9-10; Mt 7:14; Jo 14:16

g10:10Jo 10:28

h10:11Wee 23:1; Ais 40:11; Ese 34:11-16; Jo 15:13; Ip 13:20; 1 Pi 5:4; 1 Jo 3:16; Pa 7:17

i10:12Jet 23:1; Ese 34:3-8; Sak 11:17; Ap 20:29

j10:14Jo 10:26-27; 2 Ti 2:19; 1 Jo 2:4

k10:15Mt 11:25-27; Lu 10:22; Jo 15:9,13; 1 Jo 3:16

l10:16Jen 11:9; Ais 56:8; Jet 23:3; Ese 34:23, 37:24; Jo 11:52, 17:20; Ep 2:13-18, 4:4-6; 1 Pi 2:25

m10:17Jo 3:35, 8:29; Ip 10:10

n10:18Jo 5:26, 13:1, 14:30-31, 19:11,30; Pl 2:8-9; Ip 5:8

o10:19:1, 14:30-31, 19:11,30; Pl 2:8-9; Jo 7:43, 9:16

p10:20Osi 9:7; Jo 7:20, 8:48

q10:21Jo 3:2, 9:30-32

r10:23Ap 3:11, 5:12

s10:24Lu 22:67; Jo 8:25

t10:25Jo 4:26, 5:36, 10:38

u10:26Pot 28:5; Jo 8:45; 1 Ko 2:14

v10:27Jo 8:47, 10:3-4, 14-15

w10:28Jo 3:16, 6:39, 10:10, 17:2; Lo 8:33-39; 1 Jo 2:25

x10:29Dit 32:39, 33:3; Ais 43:13, 51:16; Jo 3:35

y10:30Jo 17:21

z10:31Jo 8:59, 11:8

aa10:33Lep 24:16; Mt 9:3, 26:65; Mk 14:64; Lu 22:70-71; Jo 5:18, 19:7

ab10:34Mt 5:18; Jo 11:4,27; Lo 3:19

ac10:35Jo 1:12, 12:34, 15:25; Ip 1:2

ad10:36Jo 6:67-69, 17:18

ae10:38Jo 14:10-11, 17:21

af10:39Lu 4:30; Jo 7:30, 8:59

ag10:40Mt 19:1; Mk 10:1; Jo 1:28

ah10:42Jo 7:31, 11:45

John 10

Sipisipi kamenya lao kongali pii doko

1 Dee ^a Jisasame dokaita lamaiyoo, “Nambame etete kiningi nyakama langilyona, endakali mendeme sipisipi kame kaita lumbao nyingi dokonya napenya, waka mendasa kaita kisoo pyakanatamo akali doko baa pake nao makongao paenge akali. 2 Dopaka ^b doko, kaita lumbao nyetaenya epenge akali doko baa sipisipi setao katenge doko. 3 Kaita ^c isingi akali dokome baanya kaita lumbakamaingi. Dokopa sipisipi dupame baanya pii sakamaingima. Baame baa tangenya sipisipi dupanya kenge lao wii latala baame kamaka laminao penge. 4 Baame ^d baanya sipisipi dupa pitaka laminao kamaka pyakalyetala baa wambao penge. Dopa pilyamopa baanya sipisipi dupame baanya pii singima dokonyana baa watao pengema. 5 Dupame endakali waka mende watao napengema, daa. Dupame waka dupa paka pengema. Doko, dupame pii wakamanya dupa nasingimana,” lea.

6 Jisasame ^e kongali pii doko dokaita lamaiyamoaka doko, dokaitame pii doko aipa lelyape lao nasiami.

Jisasa sipisipi setao katenge epe doko

7 Dokopa Jisasame deaka lao pituu, “Nambame etete kiningi nyakama langilyona, sipisipi kolandenge kaita doko namba. 8 Namba naepengesa wambao kateamino endakali dupa pitaka pake nengepi makongao paengepi dupa kateami. Dopaka doko, sipisipi dupame dokaitanya pii nasakamaiyami. 9 Namba ^f kaita dokona endakali mende namba katatosa ipupala kakopatinya patamo doko auu pyoo katata. Baa kamenya pata kamanda pata pyoo nee nyoo katata. 10 Pake ^g nenge akali dokome sipisipi dupa pake nyepa pyao kumaseta koyaseta pyaanya iki epenge. Dopana, namba epeo doko dupame lete katenge doko nyepala lete kalyakao katena lao epeona,” lea. 11 “Sipisipi ^h setao katenge akali epe doko namba. Sipisipi setao katenge akali epe dokome sipisipi dupa nisoo baa kumingi. 12 Akali ⁱ sipisipi setao kalya naenge yole kalai iki pingi dokome sipisipi dupa baanya daa dokonyana, yana kapua mende epelyamo kandatala dokopa baame sipisipi dupa yakinatala paka penge. Dokopa yana kapua dokome sipisipi dupa pyao nao watao yangi pyaa pyaa pingi. 13 Doko, akali doko baa yole kalai iki pingi dokonyana baame sipisipi dupa nea nakaenge. 14 Sipisipi ^{j
,} ^k setao katenge akali epe doko namba. Takange dokome namba kandelyamopa nambame Takange kandenge mendai dopaka pyoo nambame nambanya sipisipi dupa kandelyopa nambanya sipisipi dupame namba kandengema. Dee nambame nambanya sipisipi dupa nisoo namba kumato. 16 Dee ^l nambanya sipisipi mendakaita kame dakenya nakalyamino dupa apata nambame lanyepenge. Dopa pitopa dupame nambanya pii soo sipisipi tata mendai joo katataminopa setao katenge mendaiyaka katata. 17 Namba ^m kumapala dee lete katapenge tenge dokonya Takangeme namba auu kaelyamo. 18 Endakali ⁿ mendeme namba kumasala nayapenge, daa. Namba tangeme kumapenge. Namba kumapenge pupu lapae doko namba-kisa soo dee namba lete katapenge pupu lapae doko namba-kisa soaka pingi. Nambanya Takangeme namba dopa pipi leana,” lea.

19 Juta ^o dupame pii dutupa sepala deaka lita pyoloo piami. 20 Dupanya ^p endakali longo dupame lao pituu, “Baa-kisa enjele koo palipumopa baa kyekelyamona, nyakamame aipuma baanya pii sakamailyamipi?” leami. 21 Yangi ^q dupame lao pituu, “Pii dutupa enjele koo palenge endakali mendenya pii daana, enjele koome kapa pao endakali lenge monda dupa lenge tasingipi?” leami.

Juta dupame Jisasa yandapipi jiamino doko

22 Dokopa losuu anda andake doko dee kaita lumbiamina lao masingi gii epe doko koo kana paleamopa Jetusaleme epea. 23 Gii ^r dokopa losuu anda andake kame Solomone lenge dokaita Jisasa baa paya. 24 Dopa ^s piamopa Juta dupame ipao baa katao kakopatala lamaiyoo, “Paa akipatesa embame naimanya masingi minao andakao katatepe? Emba Kataisa doko tamo kandao doko, embame naima panao langi,” leami.

25 Dokopa ^t Jisasame dokaitanya pii yanu pyao lamaiyoo, “Nambame nyakama langitapupa, nyakamame masoo naminilyamino. Nambame nambanya Takangenya pii minao kalai pipu dupame namba dokona lao panelyamo. 26 Dopaka ^u doko, nyakama nambanya sipisipi daa dokonyana nyakamame masoo naminilyamino. 27 Nambanya ^v sipisipi dupame nambanya pii singima. Nambame dupa masilyopa dupame namba watao epengema. 28 Nambame ^w dupa lete etete katena lao katasilyona dupa etete kumalapi mende nayatami. Mendaipi mendeme nambanya kinginya dupa pyasoo nanyeta. 29 Nambanya ^x Takange dokome endakali dakaita namba dia. Baame dupa pitaka ita miningi. Dopana, endakali mendaipi mendeme nambanya Takangenya kinginya kapa pao dupa pyasoo nanyeta. 30 Nambapa ^y nambanya Takangepa nalimba mendaina,” lea.

31 Dokopa ^z Juta dupame baa kaname pyalanya deaka kana nyiami. 32 Dopa piaminopa Jisasame dokaita lamaiyoo, “Nambame nambanya Takangeme kalai pyale lao dia dupanya epe longo mendapua kanjepale lao laitaka petapu. Nambame kalai pipu dutupanya andukunya nyakamame namba kaname pyalanya pilyamipi?” lea. 33 Dopa ^aa leamopa Juta dupame baanya pii yanu pyao, “Naimame kalai epe mende lao masetala emba kaname pyalanya napilyamano. Dopaka doko, embame Gote kilya kandao emba akali meaka dokome emba Gote jilino dokonya pyalanya pilyamanona,” leami. 34 Dokopa ^ab Jisasame dupanya pii yanu pyao, “Gotenya pii pepa pyapae itaki pilyamino dupame, ‘Nambame nyakama gotena leona,’ lapae nasilyape? 35 Pii ^ac pepa pyapae singi doko mee nanjeta. Wamba Goteme endakali dokaita-kisa baanya pii doko pena latala dokaita gotena latea. 36 Dopana, ^ad Takangeme namba etete epe injisoo makande petala, baame namba isa yuunya puu leamopa yuu dakenya epeo. Nambame namba Gotenya Ikiningina lapu dokonya Gote kilya kandeleno lelyamipi? 37 Nambame nambanya Takangeme leamoli napio kandeno doko, nyakamame namba lao masoo minala nayalapape. 38 Dopaka ^ae doko, nambame baanya lelyamoli pyoo pyakamaingi. Dopana, nyakamame namba masoo minala nayami kandeno doko, nambame kalai pilyo dupa masoo minalapape. Dopa petala nyakamame Takangepa nambapa mendai lamo lao masatamina,” lea.

39 Dokopa ^af dupame baa anjemana lao dee makande piaminoaka doko, baa kolanyetala alu pia.

40 Dopa ^ag petala Jisasa endaki Jotane yangitena-kaita dee pilyoo pupala Joneme wambao endakali dupanya kaimbu pyakamaiyamo yuu dokonya pao katea. 41 Dokopa endakali longo dupa baa kateasa ipupala dupame lao pituu, “Joneme kongali mende napiamoaka doko, Joneme akali dake kandao pii leamo dupa pitaka kiningina,” leami. 42 Dopa ^ah latala yuu doo tange endakali longome baa lao masoo miniami.